ကလေးကျောရိုး ပုံမမှန်မှုကုသရေး စင်တာ

သာမန်ဖျားနာခြင်းလိုမဟုတ်တဲ့ ဒီရောဂါမှာ သိသာထင်ရှားတဲ့ ရောဂါလက္ခဏာတွေ မပြတတ်ပါဘူး။  ကျောရိုးပုံမမှန်မှုရောဂါရှိတဲ့ ကလေးငယ်တွေမှာ ကျောရိုးရဲ့ ကွေးညွတ်မှု ဆိုးဆိုးရွားရွား မဖြစ်ခင်ထိ ဘာလက္ခ ဏာမှ မပြတတ်ပါဘူး။ ဒီရောဂါဟာ ယေဘုယျအားဖြင့် ဆယ်ကျော်သက်အရွယ် မှာပိုပြီးတွေ့ ရတယ်ဆိုပေမယ့် မွေးရာပါကလေးငယ်များမှ စလို့ ဆယ်ကျော်သက်အရွယ်ထိ ဖြစ်ပွားတတ်တယ်လို့ပြောရင် ပိုပြီးမှန်ပါလိမ့်မယ်။  ဆယ်ကျော်သက်အရွယ်မှာ ဖြစ်လေ့ရှိတဲ့ ကျောရိုးပုံမမှန်မှုရောဂါ ကို ဖြစ်စေတဲ့ အကြောင်းအရင်းများစွာရှိပေမယ့် (၈၀) ရာခိုင်နှုန်းခန့် လူနာများမှာ  တိကျတဲ့ အဓိကဖြစ်ရတဲ့အကြောင်းအရင်းခံကို မသိရပါဘူး။ မျိုးရိုးဗီဇကြောင့် ဖြစ်နိုင်တာမို့ မိသားစုဝင်ထဲမှာ ဖြစ်နိုင်ပါတယ်။  ညီအစ်ကို မောင်နှမသားချင်းထဲမှာ ဒီရောဂါရှိမယ်ဆိုရင် အဲဒီ မိသားစုက ကလေးငယ်မှာ ဖြစ်နိုင်ခြေရှိပါတယ်။ တချို့မိသားစုတွေမှာ တစ်ဦးတည်းသောကလေးငယ်မှာ မွေးရာပါကျောရိုးပုံမမှန်မှုရောဂါ ဖြစ်တာကို တွေ့ရနိုင် ပါတယ်။ လေ့လာမှုများအရ ထိုင်းမှာရှိတဲ့ ကလေးငယ် အယောက် တစ်သောင်းမှာ တစ်ယောက်သာလျှင်ကျောရိုး ပုံမမှန်မှုရောဂါအတွက် ကုသမှုလိုအပ်တယ်လို့ ဆိုပါတယ်။ ဒါပေမယ့်လည်းကုသမှုလုပ်ဖို့ မလိုအပ်တဲ့ Mild Scoliosis ခေါ်  မပြင်းထန်တဲ့ကျောရိုးမူမမှန်မှုရောဂါ ( ကျောရိုးကွေးညွတ်မှုအနေအထား ၁၀ ဒီဂရီမှ ၂၅ ဒီဂရီအတွင်း) ဖြစ်နေတဲ့ ကလေးငယ်တွေလည်းအများ အပြားရှိပါတယ်။ ဒီနေ့ခေတ်မှာတော့ မိဘတွေဟာ ကလေးငယ်တွေအတွက် ပိုမိုသတိထား ဂရုစိုက်လာကြ သလို အနေအထားချို့ယွင်းမှုကို အချိန်မဆွဲဘဲ မြန်မြန်စစ်ဆေးနိုင်တဲ့ အရိုးရောဂါအထူးကု ဆရာဝန်တွေလည်း ပိုမိုများ ပြားလာတာကြောင့် ဒီရောဂါကို ကလေးတွေမှာ ပိုမိုတွေ့မြင်လာရပြီ ဖြစ်ပါတယ်။

ကျောရိုးမူမမှန်မှုရောဂါကို အမျိုးအစားအလိုက်ခွဲခြားသတ်မှတ်နိုင်ပါတယ် ……

၁ ။ ဖြောင့်ဖြောင့်တန်းတန်းရှိနေတဲ့ ကျောရိုးဟာ တစ်ချိန်မှာ ကွေးညွတ်သွားတတ်ပါတယ်။ ဘာလို့ဖြစ်လဲ ဆိုတာ တိတိကျကျ မသိရပါဘူး။  အာရုံကြောအဖွဲ့အစည်း ကို ထိန်းချုပ်ထားတဲ့ ဟော်မုန်းများနဲ့ ဆက်နွယ်နေနိုင်ပြီး ယင်း ဟော်မုန်းများ က ကျောရိုးကို ကွေးညွတ်သွားစေတာ ဖြစ်နိုင်ပါတယ်။ ကျောရိုးပုံမမှန်မှုရောဂါရဲ့ (၈၀) ရာခိုင်နှုန်းနီးပါးလောက်ဟာ ဒီလို အခြေအနေတွေဖြစ်ပါတယ်။ ဒါကိုထပ်ပြီးတော့ အသက်အရွယ်လိုက်ပြီး အုပ်စု(၃)ခု ခွဲခြားနိုင်ပါတယ်။

• မွေးကင်းစမှ အသက်တစ်နှစ်    - ကလေးငယ်များဟာ ဒီအရွယ်မှာ မတ်တပ်စရပ်ပြီး လမ်းစ လျှောက်  ခြင်း အခြေနေများကြောင့် ဖြစ်တတ်ပါတယ်။ ကြီးထွားဖွံ့ဖြိုးလာတာနဲ့အမျှ ဒီအရွယ် ကလေးငယ်များရဲ့ (၉၀) ရာခိုင်နှုန်းဟာ ကိုယ်တိုင် ဖြေရှင်းနိုင်ပါတယ်။
• အသက်(၃)နှစ်မှ (၁၀) နှစ်အရွယ်  - ဒီအသက်အရွယ်မှာ လူနာအရေအတွက်ဟာ ပိုများလာပါပြီ။ တကယ်လို့ ကွေးညွတ်သွားတဲ့ကျောရိုးဟာ ပိုမိုပြင်းထန်လာပြီး မကုသဘဲ ထားလိုက်မယ်ဆိုရင် ဒီကလေးငယ်တွေဟာ ရေရှည်မှာ ပြဿနာ ကြီးလာနိုင်ပါတယ်။
• အသက်(၁၀)နှစ်မှ (၁၈) နှစ် - ကျောရိုးပုံမမှန်မှုရောဂါဟာ ဆယ်ကျော်သက်အရွယ် မှာ အများဆုံး ဖြစ်တတ်ပါတယ်။ မပြင်းထန်တဲ့ကျောရိုးပုံမမှန်မှုရောဂါဟာ ကုသဖို့ မလိုပါဘူး။ ကွေးသွားတဲ့ ကျောရိုးဟာ ပိုမိုသိသာလာသလို ပုံမမှန်ခြင်းများမှတစ်ဆင့် ရုပ်ပိုင်းဆိုင်ရာ ဖွံ့ဖြိုးမှုတွေကို ယိုယွင်း စေတာကြောင့် ဆရာဝန်နဲ့ အကြိမ်ကြိမ်စစ်ဆေးဖို့ အကြံပေးချင်ပါ တယ်။ ကျောရိုးစောင်းနေတဲ့ အနေအထားဒီဂရီကို ဆရာဝန်က တိုင်းတာပါလိမ့်မယ်။ အသက် (၁၅)နှစ်အောက် အရွယ် တွေမှာကျောရိုးကွေးညွတ်ခြင်းဟာ (၃၀) ဒီဂရီကနေ (၄၀) ဒီဂရီကြား ရှိနေမယ်ဆိုရင် ကွေးညွတ်ခြင်းကနေ ပြန်လည် တိုးတက်လာဖို့ ကျောထိန်းခါးပတ် (Scoliosis Brace) ဝတ်ဆင်ဖို့ ဆရာဝန်က အကြံပြုပါလိမ့် မယ်။ ဒါပေမယ့် ကျောရိုးကွေးခြင်း အနအထား ပိုဆိုးလာမယ်ဆိုရင် ခွဲစိတ်မှုကုသမှု ပြုလုပ်ရမှာဖြစ်ပါတယ်။ ယင်း ခွဲစိတ်မှု အတွင်း ကျောရိုး ဘက်ညီအောင် သတ္တု အစားထိုးထည့်သွင်းခြင်း (Metal Implants) လည်း ပါဝင်မှာဖြစ်ပါတယ်။ 

၂ ။ မွေးရာပါ ကျောရိုးပုံမမှန်မှု ကတော့ တိကျတဲ့ အကြောင်းအရင်းမရှိပါဘူး။ ကိုယ်ဝန်ဆောင်စဉ်ကာလ အတွင်း မိခင် သောက်ရတဲ့ ဆေးဝါးများကြောင့်လည်း ဖြစ်နိုင်ပါတယ်။ ဒါဟာ ကျောရိုးဖွံ့ဖြိုးမှု ဟန်ချက် မညီခြင်းဖြစ်နိုင်ပြီး အရိုးပုံမှန်မဟုတ်ခြင်းရဲ့ အကျိုးဆက်ဖြစ်ပါတယ်။ ဒီလိုအမျိုးအစားထဲမှာပါတဲ့ ကျောရိုး ကွေးညွတ်ခြင်းဟာ ပိုဆိုးနိုင်ပြီး သေချာဂရုစိုက်စစ်ဆေးကုသဖို့လိုပါတယ်။ ဒီလိုမဟုတ်ဘဲ ပိုမို ဆိုးရွားလာ မယ်ဆိုရင်တော့ သွက်ချာပါဒ(Paralysis) အထိ ဖြစ်နိုင်ပါတယ်။

၃ ။ ကလေးတွေကြီးထွားဖွံ့ဖြိုးလာတဲ့အချိန်မှာ  အာရုံကြော (သို့မဟုတ်) ဦးနှောက်မူမမှန်ခြင်း ၊ ဦးနှောက်ထိခိုက်မှုကြောင့်ကြွက်သား လုပ်ဆောင်မှုပျက်စီးခြင်း ၊ ပိုလီယိုရောဂါ ၊ ကြွက်သားမူမမှန်ခြင်း တို့လို  ကြွက်သားအဖွဲ့အစည်း မူမမှန်ခြင်း များကြောင့်လည်း ကျောရိုးပုံမှန်မဟုတ်မှု အခြေအနေ ဖြစ်တတ်ပါတယ်။

၄ ။ အာရုံကြောပေါ်မှအကျိတ်များကြီးထွားခြင်း(Neurofibromatosis) အခြေအနေခံစားနေရသူ (၃၀) ရာခိုင်နှုန်းလောက်ဟာ ကျောရိုးပုံမမှန်မှု ဖြစ်လေ့ရှိပြီး ခန္ဓာကိုယ်ပေါ်မှာ အဖုအပိန့်များထွက်လာခြင်းနဲ့ အညိုရောင် အစက်အပြောက်တွေ ထွက်လာတတ်ပါတယ်။

တကယ်လို့ ကလေးငယ်တွေမှာ ကျောရိုးပုံမမှန်မှု ဖြစ်ဖို့အလားအလာ လက္ခဏာ ရှိတယ်ဆိုရင် မိဘတွေအနေနဲ့ စစ်ဆေးလို့ရပါတယ်။ စစ်ဆေးမယ်ဆိုရင် ကလေးကို တည့်တည့်မတ်မတ် ရပ်ခိုင်းပြီး ကျောရိုး ကွေးညွတ်မှု ရှိ မရှိ စစ်ဆေးဖို့လိုပါမယ်။ ပြီးရင် ကလေးရဲ့ ခန္ဓာကိုယ်ကို အရှေ့သို့ ကိုင်း ခိုင်းပြီး ကြမ်းပြင်နဲ့ လက်ကိုထိစေကာ ကျောရိုး ကွေးညွတ်မှု ရှိမရှိ စမ်းသပ် ရပါမယ်။ ကျောရိုးက ဖြောင့်ဖြောင့်တန်းတန်းပဲ ရှိနေပုံပေါ်ရင် ဘာပြဿနာ မှ မရှိပါဘူး။  မိဘတွေအနေနဲ့ ရောဂါရှာဖွေဖို့အတွက် ဆေးဘက်ဆိုင်ရာ နည်းလမ်းတွေအရ ဂရုစိုက်ဖို့ လိုအပ် ပြီး ရောဂါလက္ခဏာတွေ အချိန်နှောင်းမှ ပို မဆိုးလာအောင်  အောက်ပါလက္ခဏာတွေ ရှိနေပြီ ဆိုရင် သေချာ လုပ်ဆောင်ရပါမယ်။

• ကျောရိုးမှာ တစ်နေရာရာကွေးညွတ်နေတဲ့အခြေအနေ ။
• ပုခုံးအနိမ့်အမြင့်မညီခြင်း ( လက်မောင်းအနောက်ရှိသုံးထောင့်ပုံ အရိုး ဟာ တခြားတစ်ဖက် ထက် ငေါထွက်နေခြင်း) ။
• ဦးခေါင်းဟာ တင်ပါးဆုံရိုးနဲ့ အလယ်တည့်တည့်မကျခြင်း အခြေအနေ ။
• တင်ပါးတစ်ဖက်ဟာ တခြားတစ်ဖက်ထက် ပိုမြင့်နေတဲ့အခြေအနေ ။
• နံရိုးများမညီခြင်း ။
• ခါးအရစ်ကြောင်းညီညာမှုမရှိခြင်း ။
• ခန္ဓာကိုယ်ပေါ်ရှိ အရေပြားအခြေအနေများ တစ်ဘက်နှင့် တစ်ဘက်မတူခြင်း ( ဥပမာ - ချိုင့်ခွက် ကလေးများ ၊ အမွှေးအမျှင်အကွက်များ ၊ ပုံမှန်မဟုတ်သောအရောင်များ ) ။
• ခန္ဓာကိုယ်တစ်ခုလုံး တစ်ဘက်သို့ ယိုင်စောင်းနေခြင်း။

ဆယ်ကျော်သက်အရွယ်မှာဖြစ်တဲ့ ကျောရိုးပုံမမှန်မှုကို မကုသဘဲ ထားလိုက်မယ်ဆိုရင် ပိုဆိုးလာပြီး  ခန္ဓာကိုယ်စောင်းခြင်း ၊ ပုခုံးနိမ့်ကျခြင်း ၊ ခါးစောင်းနေခြင်း ၊ ခန္ဓာကိုယ်မသန်မစွမ်းဖြစ်ခြင်း ၊ ကျောအောင့်ခြင်း ၊ အသက်ရှူရန်ခက်ခဲခြင်း ၊ အမောဆို့ခြင်း ၊ နမိုးနီးယားအဆုတ်ရောင်ရောဂါ ၊ အဆုတ်ထဲပိုးဝင်ခြင်း ၊ နှလုံးအလုပ်ပိုများစေပြီး နှလုံး အလုပ်မလုပ်နိုင်သည်အထိဖြစ်ခြင်း စတဲ့ သိသိသာသာကျန်းမာရေးပြဿနာများ ဖြစ်လာနိုင်ပါတယ်။

ကျောရိုးပုံမမှန်မှုကို အမျိုးအစားခွဲခြားနိုင်ပါတယ်။

ကျောရိုးပုံမမှန်မှုရောဂါရှာဖွေစစ်ဆေးခြင်း

ပုံမှန်မဟုတ်တဲ့ အခြေအနေတွေကို စစ်ဆေးဖို့အတွက် အာရုံကြောအဖွဲ့အစည်းကိုလည်း ဆရာဝန်က စမ်းသပ်စစ်ဆေးပါလိမ့်မယ် ။ အသေးစိတ်ရောဂါရှာဖွေမှုများ ၊ ရောဂါအတိမ်အနက်နဲ့ လူနာရဲ့ အရိုး သက်တမ်းကို အသေးစိတ် စစ်ဆေးနိုင်ဖို့အတွက် Radiographic Test ( X-Ray သို့မဟုတ် Gamma Ray ဖြင့် ခန္ဓာကိုယ်အတွင်းပိုင်းစစ်ဆေးခြင်း ) အသုံးပြုဖို့ လိုကောင်းလိုပါလိမ့်မယ်။

ရွေးချယ်စရာကုသမှုနည်းလမ်းများ

• ခွဲစိတ်ဖို့မလိုတဲ့ကုသမှု  - ကျောရိုးကွေးညွတ်မှုဟာ မပြင်းထန်တဲ့ အခြေအနေဆိုရင် ဂရုတစိုက်စောင့်ကြည့်ခြင်း ၊ ရုပ်ပိုင်းဆိုင်ရာကုထုံး (Physical Therapy)  နဲ့ ကျောရိုးထိန်းခါးပတ် အသုံးပြုခြင်း က လွဲလို့ တခြားကုသမှုမလိုအပ်ပါဘူး။
• ခွဲစိတ်ကုသမှု  - တကယ်လို့ ကျောရိုးကွေးညွတ်မှုဟာ ထပ်မံစစ်ဆေးခြင်း နဲ့ သမားရိုးကျကုသမှု အချိန်အတွင်းမှာပဲ ပိုဆိုးလာမယ်ဆိုရင် ခွဲစိတ်ကုသဖို့ လိုအပ်မှာဖြစ်ပါတယ်။ 

ရုပ်ပိုင်းဆိုင်ရာကုထုံး(Physical Therapy)     -  ရုပ်ပိုင်းဆိုင်ရာကုထုံး (Physical Therapy) ဆိုတာကတော့ အိပ်စက်နေချိန်အနေအထား နဲ့ ရုပ်ပိုင်းဆိုင်ရာ အနေအထားများကို ထိန်းညှိကုသပေးတဲ့ နည်းလမ်းဖြစ်ပြီး ကျောရိုးဟန်ချက်ပြန်ညီ စေတဲ့ သင့်လျော်သောလေ့ကျင့်ခန်းများနဲ့ ကျောရိုးဖြောင့်တန်းမှု အနီးစပ်ဆုံးဖြစ်အောင် လုပ်ဆောင်တာ ဖြစ်ပါတယ်။ ရောဂါအခြေအနေတစ်ခုချင်းစီအလိုက် တိတိကျကျကုသမှုနည်းလမ်း တွေလည်း ပြောင်းလဲပါတယ်။ ဒါပေမယ့်လည်း အထိရောက်ဆုံး အကျိုးသက်ရောက်မှု ရရှိဖို့အတွက် သေချာတတ် ကျွမ်းနားလည်ပြီး လေ့ကျင့်ထားတဲ့ ပညာရှင်တွေရဲ့ ဦးဆောင်မှုနဲ့ လုပ်ဆောင် ကုသဖို့ လိုပါတယ်။

Samitivej’s New Life Fund (ဘဝသစ်ဖောင်ဒေးရှင်း)

ချို့တဲ့နွမ်းပါးတဲ့ ကလေးငယ်များအတွက် အဆင့်မြင့် ခွဲစိတ်ကုသမှုများ ရရှိစေနိုင်မယ့် အခွင့်အရေး ကို ရည်မှန်းပြီး ဆစ်မီတဝေ့ရဲ့ New Life Fund ကို တည်ထောင်ခဲ့ပါတယ်။ ဒီဖောင်ဒေးရှင်းကို သဒ္ဒါထက်သန်စွာ လှူဒါန်းလာတဲ့ လှူဒါန်းမှုများနဲ့ ကျွန်တော်တို့ ဆစ်မီတဝေ့ဆရာဝန်များရဲ့ ကြိုးစားအားထုတ်မှုကြောင့် ကျောရိုးပုံမမှန်မှုခံစားနေရတဲ့ ချို့တဲ့ကလေးငယ်တွေ ကုသမှုခံယူဖို့ နဲ့ ကျန်းမာသန်စွမ်းတဲ့ အဖိုးတန်လူငယ်များဖြစ်လာနိုင်မယ့် အခွင့်အရေး ရရှိလာပါတယ်။

၂၀၁၆ ခုနှစ် မှာ ကျရောက်ခဲ့တဲ့ ထိုင်းဘုရင်မင်းမြတ်ရဲ့ အသက် (၈၈) နှစ် မွေးနေ့ကို ဂုဏ်ပြုသော အားဖြင့် ဆစ်မီတဝေ့ရဲ့ New Life Fund ဟာ ကျောရိုးပုံမမှန်မှုရောဂါခံစားနေရတဲ့ ချို့တဲ့နွမ်းပါး ကလေးငယ်များအတွက် ခွဲစိတ်ကုသမှု (၈)ခုကို အောင်မြင်စွာ ကုသမှုပေးနိုင်ခဲ့ပါတယ်။

ဆစ်မီတဝေ့ရဲ့New Life Fund ကိုပိုမိုသိရှိဖို့ ဒီလင့်ခ်ကနေတစ်ဆင့်ဝင်ရောက်ပါ။