အဲဒီတော့ ကလေးနဲ့အချို ခွဲမရတဲ့အတူတူတော့... ကျွေးလိုက်ကြစို့...။ ဒါပေမယ့် ချိုချဉ်ဝယ်မယ်ဆိုရင်တော့ ဒါလေးတွေကို သတိပြုစေချင်ပါတယ်။
- တံဆိပ်ကို သေသေချာချာဖတ်ပါ။
ချိုချဉ်ထုပ်ကို မဝယ်ခင် အထဲမှာ ဘာတွေပါတယ်၊ အာဟာရတန်ဖိုးတွေ ဘယ်လောက်ရှိတယ် ဆိုတာကို သေသေချာချာ ဖတ်ကြည့်စေချင်ပါတယ်။ တံဆိပ်တစ်မျိုးနဲ့ တစ်မျိုးကြား သကြားဓာတ် ပါဝင်မှုနှုန်းကိုလည်း နှိုင်းယှဉ်ကြည့်စေချင် ပါတယ်။ သကြားဓာတ် ၁၂ ဂရမ်အောက် လျော့နည်းတဲ့ တံဆိပ်ကို ရွေးချယ်ရမှာ ဖြစ်ပါတယ်။ အစားအသောက် ဆိုးဆေးတွေ၊ အခြား အချိုဓာတ်ကို လွန်ကဲအောင် ထည့်ထားတဲ့ဟာတွေနဲ့ လုပ်ထားတာတွေထက်စာရင် သဘာဝပစ္စည်း တွေ ကနေ ထုတ်လုပ်တဲ့ သကြားလုံးဖြစ်ရင်တော့ အကောင်းဆုံးပါပဲ။
- သဘာဝပစ္စည်းများနဲ့ထုတ်လုပ်တဲ့ သကြားလုံးကို ရွေးပါ။
အခြားဓာတုပစ္စည်းတွေနဲ့ လုပ်ထားတဲ့ သကြားလုံးတွေထက်စာရင် အုန်းသီး၊ သကြား၊ နို့၊ ငှက်ပျောသီး၊ အခြားအသီးအနှံ စတဲ့ သဘာဝပစ္စည်းတွေနဲ့ ထုတ်လုပ်ထားတဲ့ ချိုချဉ်သကြားလုံးကလေးတွေကိုပဲ ကျွေးသင့်ပါတယ်။
- မာတဲ့သကြားလုံးတွေကို ရှောင်ပါ။
သကြားလုံးမာမာလေးတွေ၊ လိုလီပေါ့တွေ စတဲ့ ဟာလေးတွေ အမျိုးမျိုးရှိပါတယ်။ ထမင်းစားပြီးတဲ့အခါ၊ ဒါမမဟုတ်လည်း တစ်နေ့လုံး ကြိုက်တဲ့အချိန်မှာ ချိုချဉ် စုပ်နေကြတာပါပဲ။ အဲဒီအကျင့်ကတော့ သွားတွေ ဆိုးရွားစွာ ပျက်စီးခြင်း နဲ့ သွေးတွင်းသကြားဓာတ်မြင့်တက်လာခြင်းနဲ့အတူ တံတွေးထဲမှာ အက်ဆစ်ထုတ်တဲ့ ဘက်တီးရီးယားတွေ ပိုများလာ တာကို တွေ့ရပြီး ဒါဟာ သွားတွေ ဆွေးမြေ့ပျက်စီးတဲ့ဘက်ကို ဦးတည်နေပါတယ်။
ကပ်စေးနဲတွေက သွားကြားညှပ်တယ်။ ပြီးတော့ သွားတိုက်တဲ့အခါ သွားကြားထဲကဟာတွေကို ဖယ်ထုတ်ဖို့ ခက်ပါတယ်။ အဲဒီတော့ သွားပိုးစားဖို့ ပိုလွယ်ပါတယ်။
အဲဒီတော့ သကြားဓာတ်နည်းပြီး သဘာဝပစ္စည်းတွေကနေထုတ်လုပ်တဲ့ သကြားလုံးအမျိုးအစားကိုပဲ ရွေးလိုက်ပြီ ဆိုပါတော့။ ချိုတာကတော့ ချိုနေသေးတာပါပဲ။ ဒါကြောင့် အချိုစားတာမလွန်အောင် အကန့်အသတ်နဲ့ပဲ ကျွေးသင့်ပါတယ်။ ဒီအတိုင်း ချကျွေးထားတာထက်စာရင် တစ်နေ့ တစ်လုံး / ၂ လုံး နှုန်းတို့၊ ထူးခြားတဲ့နေ့မျိုးမှ တို့၊ တစ်ခုခုအတွက် ဆုချတဲ့အခါမျိုးတို့ စ တဲ့ အချိန်တွေကျမှ ကျွေးတာမျိုးလို ကန့်သတ်ထားစေချင်ပါတယ်။
- ကျွေးသင့်တဲ့အချိန်မှာပဲ ကျွေးပါ။
ထမင်းမစားခင်မှာ ချိုချဉ် ကျွေးလိုက်ရင် ရင်ပြည့်သွားတတ်ပါတယ်။ ကစားခုန်စားလုပ်နေရင်း တို့ ကားစီးနေရင်းတို့ စတဲ့ အချိန်တွေမှာလည်း မကျွေးသင့်ပါဘူး။ ကစားရင်း ကားစီးရင် မတော်တဆ လဲကျ ပြုတ်ကျတဲ့အခါ ချိုချဉ်ဟာ လည်ချောင်းထဲမှာ တစ်ပြီး နင် သွားနိုင်တဲ့ အန္တရာယ်ရှိပါတယ်။
အချိုစားပြီးတိုင်း၊ အစာစားပြီးတိုင်း သွားတိုက်တတ်တဲ့ အကျင့်ကလေးကို ကလေးတွေမှာ ကျင့်ထားပေးစေလိုပါတယ်။ ဒါမှ သွားကြားမှာကပ်နေတဲ့ သကြားနဲ့ အချိုဓာတ်တွေကို နည်းသွားအောင်လုပ်ပေးနိုင်မှာဖြစ်ပြီး သွားပိုးစားခြင်းကို ကာကွယ်ပေးနိုင်မှာ ဖြစ်ပါတယ်။
