အိပ်တဲ့အခါ ဟောက်ခြင်း၊ အိပ်နေရင်းခဏတာအသက်ရှူရပ်သွားခြင်းတို့ကို ဖြစ်စေတတ်တဲ့ အက်ဒီနွိုက်ဂလင်းကြီးနေတဲ့ ကလေးငယ်တို့အတွက် ကုထုံး

အက်ဒီနွိုက်တွေ ကြီးထွားလာရခြင်းဟာ နှာခေါင်းကတစ်ဆင့် ဝင်ရောက်လာတဲ့ ဘက်တီးရီးယား သို့မဟုတ် ဗိုင်းရပ်စ်ပိုး ကူးစက်မှုတွေကြောင့် ဖြစ်ပွားရတာဖြစ်ပြီး၊ ဒါကလည်း ရောဂါပိုးကို တားဆီးဖို့အတွက် ခန္ဓာကိုယ်ရဲ့ သဘာဝ ကိုယ်ခံအား တုံ့ပြန်မှု တစ်ခုပဲဖြစ်ပါတယ်။ ပုံမှန်အားဖြင့် ရောဂါပိုး လျော့ပါးသွားပြီဆိုတာနဲ့ အက်ဒီနွိုက် တွေဟာလည်း သူတို့ရဲ့ ပုံမှန်အရွယ်အစားကို ပြန် ကျုံ့သွားပါတယ်။ ဒါပေမယ့် တချို့ကလေးတွေမှာကျတော့ ရောဂါပိုး ကင်းစင်သွားပြီးတဲ့ နောက်မှာတောင် အက်ဒီနွိုက်တွေဟာ ဆက်လက် ရောင်ရမ်းနေတတ်ပါတယ်။ ဓာတ်မတည့်ခြင်း၊ နာတာရှည် ထိပ်ကပ်နာ၊ သို့မဟုတ် ထပ်ခါတလဲလဲ အအေးမိဖျားနာခြင်း  စတဲ့ အခြေအနေ များသည်လည်း အက်ဒီနွိုက်တွေ အမြဲတမ်းကြီးထွားနေမှုကို ဖြစ်ပေါ်စေနိုင်ပါတယ်။

• ပါးစပ်ကနေ အဆက်မပြတ် အသက်ရှူနေရခြင်းကြောင့် မေးရိုးပုံစံမမှန်ခြင်းများ ဖြစ်လာနိုင်ပါတယ်။
• ကြီးထွားနေတဲ့ အက်ဒီနွိုက်တွေက နားအလယ်ခန်းဆီကို လေဝင်လေထွက်ခြင်းကို ပိတ်ဆို့စေတာ ကြောင့် နားအတွင်းပိုင်းအလယ်ခန်း ပိုးဝင်ခြင်းကို ဖြစ်စေနိုင်ပြီး၊ အဲဒီကမှတစ်ဆင့် အရည်တည်ခြင်း၊ အကြားအာရုံ ချွတ်ယွင်းခြင်းနှင့် စကားပြောပြဿနာများကို နောက်ဆက်တွဲဖြစ်ပေါ်စေနိုင်ပါတယ်။
• ကြီးထွားနေတဲ့ အက်ဒီနွိုက်များက လေပြွန်အပေါပိုင်းကိုလည်း  ပိတ်ဆို့တတ်တာကြောင့် အိပ်နေစဉ် အသက်ရှူခြင်း ယာယီရပ်တန့်သွားခြင်းကိုလည်း ဖြစ်စေတတ်ပါတယ်။
• အိပ်စက်မှုမှာ  ဒီလိုမျိုး အနှောင့်အယှက်‌တွေ ဖြစ်ခြင်းကြောင့် ကလေးရဲ့ ရုပ်ပိုင်းဆိုင်ရာ ဖွံ့ဖြိုးတိုးတက် မှု၊ သိမြင်နိုင်စွမ်း နဲ့ စိတ်ပိုင်းဆိုင်ရာ ကျန်းမာရေးတို့အပေါ် မှာ အနုတ်လက္ခဏာဆောင်တဲ့ သက်ရောက် မှုတွေ ဖြစ်ပေါ်စေပါတယ်။
• အက်ဒီနွိုက်တစ်သျှူးတွေဟာ ရောဂါပိုးမွှားများ ခိုအောင်းရာနေရာလည်းဖြစ်လာနိုင်ပြီး၊ ရလဒ်အနေနဲ့ နာတာရှည် အအေးမိခြင်းနှင့် အသက်ရှူလမ်းကြောင်းဆိုင်ရာ ရောဂါပိုး ထပ်တလဲလဲ ကူးစက်ခြင်းတို့ကို ဖြစ်စေနိုင်ပါတယ်။

အက်ဒီနွိုက်ကြီးခြင်းကြောင့် အသက်ရှူလမ်းကြောင်း အပေါ်ပိုင်းကို ထိခိုက်စေပြီး သိသာထင်ရှားတဲ့ လက္ခဏာ တွေဟာ များသောအားဖြင့် ညဘက်တွေမှာ ပိုပြီးပေါ်လွင်လာတတ်ပါတယ်။ အဓိကလက္ခဏာနှစ်ရပ်ကတော့  နှာခေါင်းပိတ်ခြင်း နဲ့  ဟောက်ခြင်းတို့ဖြစ်ပြီး၊ အခြား လက္ခဏာတွေကတော့ အောက်ပါအတိုင်းဖြစ်ပါတယ်။ 

• အိပ်မပျော်ခြင်း သို့မဟုတ် အိပ်ရေးမဝခြင်း
• အိပ်နေစဉ် ခဏတာ အသက်ရှူရပ်သွားခြင်း
• လည်ချောင်းနာခြင်း
• မျိုချရခက်ခဲခြင်း
• လည်ပင်းပြန်ရည်ကျိတ်များ ရောင်ရမ်းခြင်း
• နားအတွင်းပိုင်းအလယ်ခန်း ပိုးဝင်ခြင်းကြောင့် အကြားအာရုံမှာ ခပ်တိုးတိုးသာ ကြားရခြင်း သို့မဟုတ် အကြားအာရုံဆုံးရှုံးခြင်း
• ပါးစပ်မှ အသက်ရှူရခြင်းကြောင့် နှုတ်ခမ်းများ ခြောက်သွေ့ကွဲအက်ခြင်း နဲ့ ပါးစပ်အနံ့ဆိုးခြင်း
• နာတာရှည် နှာခေါင်းပိတ်ခြင်းနှင့် နှာရည်ဆက်တိုက်ယိုခြင်း 

ကလေးတွေ အိပ်ပျော်နေစဉ်မှာ ဟောက်ခြင်းရဲ့  အဓိက အကြောင်းရင်းတစ်ခုက အက်ဒီနွိုက်ကြီးနေတာကြောင့် ဖြစ်ပါတယ်။ ကလေး၏ အိပ်စက်မှုအရည်အသွေးကိုလည်း ထိခိုက်စေတာကြောင့် အာရုံစူးစိုက်နိုင်မှု ချွတ်ယွင်း ခြင်း အပါအဝင် ဖွံ့ဖြိုးမှုဆိုင်ရာ ပြဿနာများကို  ဖြစ်စေနိုင်ပါတယ်။ အထူးသဖြင့် အသက်ရှူလမ်းကြောင်း အပေါ်ပိုင်း ကျဉ်းတဲ့ ကလေးတွေမှာဆိုရင် အက်ဒီနွိုက်တွေ ကြီးထွားလာခြင်းဟာ လေလမ်းကြောင်းကို ပိတ်ဆို့ စေပြီး အိပ်နေစဉ် ခဏတာအသက်ရှူရပ်ခြင်း၊ အောက်ဆီဂျင်ချို့တဲ့ခြင်းနှင့် အခြေအနေဆိုးရွားပါက အသက် အန္တရာယ်ရှိလာနိုင်တဲ့ နောက်ဆက်တွဲ ပြဿနာတွေကို ဖြစ်စေနိုင်ပါတယ်။
အက်ဒီနွိုက်ကြီးခြင်းကြောင့် ဖြစ်တဲ့ ဟောက်ခြင်းကို မကုသဘဲ ထားမယ်ဆိုရင်၊ အိပ်ပျော်နေချိန်မှာ အောက်ဆီဂျင်ချို့တဲ့မှုကြောင့် ဦးနှောက် နဲ့ အာရုံကြောစနစ် လုပ်ငန်းဆောင်တာတွေကို ထိခိုက်စေပြီး ဖွံ့ဖြိုးမှု နှေးကွေးခြင်းကို ဖြစ်စေနိုင်ပါတယ်။  နောက်ဆက်တွဲအနေ နဲ့ ပညာရေးစွမ်းဆောင်ရည် နိမ့်ကျခြင်း၊ အတက်ကြွလွန်ခြင်း စတာတွေအပြင် ပါးစပ်ဖြင့် အသက်ရှူရတဲ့ အလေ့အထကြောင့် မျက်နှာပုံစံ ဖွဲ့စည်းပုံ မမှန်ခြင်းမျိုးအထိတောင် ဖြစ်သွားစေနိုင်ပါတယ်။ ဒါ့အပြင် အက်ဒီနွိုက်ကြီးခြင်းဟာ ပုံမှန်အိပ်စက်မှုကို အနှောင့်အယှက်ဖြစ်စေပြီး ကလေးအတွက် လုံလောက် တဲ့ အနားယူမှု မရတာကြောင့် အလွန်အမင်း တက်ကြွနေခြင်း၊ ကြီးထွားမှုနောက်ကျခြင်း၊ အသက်နည်းနည်း ကြီးလာတဲ့တိုင် အိပ်ရာထဲ ဆီးသွားခြင်းနဲ့ အိပ်နေစဉ် အောက်ဆီဂျင် ထပ်ခါတလဲလဲ ချို့တဲ့မှုကြောင့် အခြေအနေဆိုးရွားပါက နှလုံးပျက်စီးခြင်း စတဲ့ နောက်ဆက်တွဲပြဿနာတွေအထိ ဖြစ်လာနိုင်ပါတယ်။

ဒါကြောင့် သားသားမီးမီးတို့ အိပ်နေစဉ် ဟောက်ပါက ပုံမှန်လို့ ယူဆပြီး ပေါ့ပေါ့ဆဆ မထားသင့်ပါ။ ဖြစ်ပေါ် လာနိုင်တဲ့ ရေရှည်ဆိုးကျိုးတွေကို ကာကွယ်နိုင်စေဖို့ ဆရာဝန်နှင့် ချက်ချင်း တိုင်ပင်ဆွေးနွေးပြီး မှန်ကန်တဲ့ ရောဂါရှာဖွေခြင်းနဲ့ သင့်လျော်တဲ့ကုသမှုကို အချိန်မီ ခံယူစေသင့်ပါတယ်။

အက်ီဒနွိုက်ကြီးတာအတွက် ရောဂါရှာဖွေတဲ့နေရာမှာ ဆရာဝန်ဟာ လူနာဆေးမှတ်တမ်းနဲ့ လက္ခဏာတွေကို ပြန်လည်သုံးသပ်ခြင်းကနေ  စတင်ပါလိမ့်မယ်။ ပုံမှန်မဟုတ်တဲ့ အခြေအနေများလို့ သံသယရှိပါက အက်ဒီနွိုက် အရွယ်အစားကို စစ်ဆေးဖို့ လည်ပင်း ဓာတ်မှန်ရိုက်ခြင်း နဲ့  ပိုးဝင်ကူးစက်မှုကို စစ်ဆေးဖို့ သွေးစစ်ခြင်း စတဲ့ ထပ်ဆောင်းစစ်ဆေးမှုတွေကိုလည်း ပြုလုပ်ပါလိမ့်မယ်။ အခြေအနေ ပြင်းထန်ပါက “အိပ်စက်မှုဆိုင်ရာ စမ်းသပ်စစ်ဆေးခြင်း (အိပ်စက်ခြင်းကို စမ်းသပ်လေ့လာခြင်း)” ပြုလုပ်ဖို့ အကြံပေးနိုင်ပြီး၊ ဆေးရုံမှာ တစ်ညတာ ‌တက်ရောက်ပြီး အသက်ရှူနှုန်း၊ ဦးနှောက်လှိုင်းများ၊ နှလုံးခုန် နှုန်း၊ ရင်ဘတ်လှုပ်ရှားမှု၊ အောက်ဆီဂျင်ပမာဏ နဲ့ ကာဗွန်ဒိုင်အောက်ဆိုက်ပမာဏ စတဲ့ ခန္ဓာကိုယ်လုပ်ဆောင် ချက် အမျိုးမျိုးကို စောင့်ကြည့်စစ်ဆေးခြင်းတို့ကို လုပ်ပါလိမ့်မယ်။

ကလေးတွေမှာ အက်ဒီနွိုက်ကြီးနေတာကို ကုသမှုပေးတဲ့ ကုထုံးတွေကတော့ အခြေခံအကြောင်းရင်းပေါ် မူတည်ပြီး  အမျိုးမျိုး ကွဲပြားနိုင်ပါတယ် 

• ဓာတ်မတည့်ခြင်းကြောင့်ဖြစ်တာဆိုရင် -  ဓာတ်မတည့်စေတဲ့ အရာတွေကို ရှောင်ရှားစေခြင်းနှင့် ရောင်ရမ်းမှုကို လျှော့ချဖို့အတွက် နှာခေါင်းဖြန်းဆေးများကို အသုံးပြုရပါမယ်။
• ပိုးဝင်ခြင်းကြောင့်ဖြစ်တာဆိုရင် -  ဘက်တီးရီးယားပိုးဝင်ခြင်းကို ကုသဖို့အတွက် သင့်တော်တဲ့ ပဋိဇီဝဆေးများကို ညွှန်ကြားပေးပါလိမ့်မယ်။
• ခွဲစိတ်ကုသဖို့အထိ လိုအပ်လာရင် - ဆေးဝါးဖြင့်ကုသခြင်းက အကျိုးသက်ရောက်မှု မပြဘဲ ဟောက်ခြင်းနှင့် မကြာခဏ ဖျားနာခြင်းကဲ့သို့သော လက္ခဏာများ ဆက်ရှိနေပါက အက်ဒီနွိုက်ခွဲစိတ် ဖယ်ရှားခြင်းကို အကြံပြုကောင်း ပြုနိုင်ပါတယ်။ အက်ဒီနွိုက်ကို ဖယ်ရှားခြင်းသည် ကိုယ်ခံအားစနစ်ကို မထိခိုက်စေဘဲ၊ အိပ်နေစဉ် ခဏတာအသက်ရှူရပ်ခြင်း လက္ခဏာများရှိတဲ့ လူနာတွေရဲ့  တိုးတက် ကောင်းမွန်လာမှုဟာ ၈၅ % အထိ ရှိတယ်လို့  လေ့လာမှုများက အတည်ပြုထားပါတယ်။ အက်ဒီနွိုက် ခွဲစိတ်ခြင်း ကို ပါးစပ်မှတစ်ဆင့် ပြုလုပ်တာဖြစ်တဲ့အတွက်လည်း အပြင်ဘက်တွင် အမာရွတ် မကျန်ရှိ နိုင်ပါ။ 

• ကလေးငယ်ဟာ ခွဲစိတ်ကုသမှုခံယူဖို့ လုံလောက်တဲ့ ကျန်းမာရေးကောင်းမွန်မှုရှိကြောင်း သေချာစေရန် ဆရာဝန်က စစ်ဆေးမှာဖြစ်ပြီး ခွဲစိတ်မှုဆိုင်ရာ အန္တရာယ်ရှိနိုင်ခြေများကိုလည်း အကဲဖြတ်ပါမယ်။ 
• ခွဲစိတ်မှုမပြုလုပ်မီ ၈ နာရီအလိုမှစပြီး အစာဖြတ်ရပါလိမ့်မယ်။ (ရေနှင့် အစားအစာ လုံးဝ မစားရ)။ ဆာလောင်မှုကြောင့် စိတ်မသက်မသာဖြစ်ခြင်းကို လျှော့ချနိုင်ဖို့ ခွဲစိတ်မှုကို အများအားဖြင့် မနက်ပိုင်း တွေမှာ ပြုလုပ်လေ့ရှိပါတယ်။ 

• တစ်ပတ်တာကာလအတွက် အလွန်အကျွံစပ်သော သို့မဟုတ် အပူရှိန်ပြင်းသော အစားအစာများကို ရှောင်ရှားပါ။
• သွားများကို ပုံမှန်တိုက်ခြင်းဖြင့် ခံတွင်းသန့်ရှင်းရေးကို ထိန်းသိမ်းပါ။
• အနည်းဆုံး သုံးပတ်တာကာလအတွင်း ရေကူးခြင်းမှ ရှောင်ကြဉ်ပါ။
• ကလေးကို တစ်ပတ်ခန့် ကျောင်းမတက်စေဘဲ အနားပေးပါ။
• နောက်ဆက်တွဲ ပြဿနာတွေဟာ ဖြစ်ခဲပေမယ့် ပိုးဝင်ခြင်း သို့မဟုတ် ခွဲစိတ်ပြီးနောက် သွေးယိုစိမ့်ခြင်း စတဲ့ အန္တရာယ် အနည်းငယ်တော့ ရှိနေနိုင်ပါသေးတယ်။ ဒါကြောင့် ပြုစုစောင့်ရှောက်သူတွေဟာ ကလေးကို ဆေးညွှန်း အတိုင်း ဆေးဝါးများ သောက်သုံးစေဖို့ နဲ့ ဆရာဝန်ရဲ့ ညွှန်ကြားချက်တွေကို လိုက်နာစေဖို့ သေသေချာချာဂရုစိုက်ရပါမယ်။

ခွဲစိတ်မှုပြီးတဲ့နောက် ၂ ပတ်မှ ၃ ပတ်အတွင်းမှာ ပုံမှန်အားဖြင့် ပြန်လည်သက်သာလာပြီး တိုးတက်မှုတွေ ကိုလည်း သိသိသာသာခံစားလာရမှာ ဖြစ်ပါတယ်။

အက်ဒီနွိုက်ကြီးခြင်းဟာ ကလေးတွေမှာ အဖြစ်များပြီး အပြည့်အဝကာကွယ်ပေးဖို့ မဖြစ်နိုင်ပေမယ့်၊ အရွယ်ရောက် လာတာနဲ့အမျှ များသောအားဖြင့် တိုးတက်ကောင်းမွန်လာခြင်း ဒါမှမဟုတ် ပျောက်ကင်းသွားခြင်း တို့ ဖြစ်တတ်ပါတယ်။ မိဘတွေအနေနဲ့ ကိုယ့်ရင်သွေးလေးမှာ အက်ဒီနွိုက် ကြီးနေတယ်လို့ စိုးရိမ်ပူပန်မှုရှိနေ တယ်ဆိုရင် လက္ခဏာတွေ စတင်ပေါ်ပေါက်ချိန်ကတည်းက ဆရာဝန်နဲ့ စောစီးစွာ တိုင်ပင်ဆွေးနွေးသင့်ပါတယ်။ ဆရာဝန် တွေရဲ့ ဆေးဘက်ဆိုင်ရာ အကြံဉာဏ်တွေဟာ အခြေအနေကို ထိထိရောက်ရောက် ထိန်းချုပ်စီမံနိုင်ဖို့ ကူညီ ပေးပါလိမ့်မယ်။ 

အက်ဒီနွိုက်ကြီးခြင်းဟာ ကလေးများတွေမှာ မကြာခဏတွေ့ရလေ့ရှိပြီး၊ နှာခေါင်းပိတ်ခြင်း၊ နှာရည်ယိုခြင်း စတဲ့ ဓာတ်မတည့်ခြင်း နဲ့ ဆင်တူတဲ့ လက္ခဏာတွေ နဲ့အတူ အိပ်ပျော်နေချိန်မှာ ဟောက်ခြင်း ဖြစ်ပေါ်လာတတ် ပါတယ်။ အဲဒီ ဟောက်ခြင်းကပဲ အရေးကြီးတဲ့ သတိပေးလက္ခဏာ ဖြစ်ပါတယ်။ မိဘတွေဟာ မိမိတို့ရဲ့ ကလေး ကို အနီးကပ် စောင့်ကြည့်လေ့လာသင့်ပြီး၊ ဟောက်ခြင်းက မကြာခဏဆိုသလို ဖြစ်နေတတ်ရင်၊ သို့မဟုတ် အိပ် နေစဉ် ခဏတာအသက်ရှူရပ်တာမျိုး ဖြစ်နေတတ်ရင် ရောဂါရဲ့ အကြောင်းရင်းကို သိရှိနိုင်ဖို့ နဲ့ အချိန်မီ ကုသမှု စတင်နိုင်ဖို့ ဆရာဝန်နှင့် ချက်ချင်း ပြသသင့်ပါကြောင်း အသိပေး တင်ပြလိုက်ရပါတယ်။